"مبارك عليكم الشهر يالربع، وعقب التهنئة، وما معها من لقيمات، ومحلبيه، أدخل في الموضوع، هو واتساب جميل جدا ارسله لي الشيخ محمود، أثابه الله، يحذرني ويحذركم من لصوص رمضان"!
المعاق: "الله يكفينا شرهم يابو الرجال، حتى رمضان ما سلامنا منهم، ولا من مكرهم وحيلهم".
الخبير: "سيبوا الراجل يقول لنا فحوى الرسالة، وبعدين كل واحد يدلو بطشته! قول يا عز الرجال كلهم راجل ومان شنف وداني".
الرجل: "لا هنت ولا هان راعي الديوان اللص الاول (التلفزيون) لص خطير، أُلعبان يفسد صيام الناس، وينقص الأجر بسبب مسلسلاته، وبرامجه التافهة، وسهراته الماجنة.
واما ثاني الحرامية فهي الاسواق، دير بالك منها، لأنها متخصصة في هدر المال والوقت والنظر بلا حساب، وعشان تتغلب عليها حدد اهدافك قبل الروحة له.
واما اللص الثالث يالربع فهو السهر، بالعربي شيل سالفة ابو عبده من بالك، اللي يقول فيها تري السهر مع الربع يبري العله، لان ما عنده سالفة لان السهر سارق "الفرح" أغلى الأوقات، يحرمك من التهجد والاستغفار في الثلث الاخير من الليل.
واما اللص الرابع فهو البخل عدو المرجلة، مثل ما قالوا شيبانا، لأنه يحرمك أجر وثواب الصدقة، التي تقي من النار وخصوصا صدقة شهر رمضان.
وخامس اللصوص بكل أسف يا حجي الديوانيات، لان اغلبها خالية من ذكر الله، وهذي خف منها، رعاك الله، لان اغلبها قيل وقال، وكاني وماني، اخاف تكون حسرة على أصحابها وزباينها يوم القيامة، وياليت تقفل بيبانها!
وأخيرا البغ بوس للحرامية، واللي انا اعتبره ابن ابليس البار، هو اخوانه وسائل التواصل الاجتماعي، إن استغليتها في معصية الله، وسلامتكم، ويارب ما تكون هذي الرسالة مزعجة لحضراتكم".
المتمولس: هل سألت نفسك يوم ما ما هو شعور خبزة التوست الاولى اللي نتجاهلها، شنهو ذنبها عشان نعاملها بهذه العنصرية"؟
وفي هذه الاثناء رفع على مسامعنا الشيخ زغلول اذان الظهر.
كاتب كويتي
0 تعليق