قال الرئيس عبدالفتاح السيسي إن الخطة إللي اتعملت مع دولنا كانت خطة جديدة علينا وكان أول مرة نشوف استخدام مواقع التواصل الاجتماعي في تحريك الدنيا، ولغاية دلوقتي في حجم من الشائعات والكذب كتير أوي وضخم جدا.

وأضاف الرئيس السيسي، اليوم خلال كلمته في مقر أكاديمية الشرطة، نقلتها قناة "إكسترا نيوز"، “كفاءة الكذبة إن يبقى فيها جزء حقيقي وبعدين يتحط الأجزاء الأخرى إلي الهدف منها تعظيم الضرر من الجزء الحقيقي، دي خطط وده شغل ومش هينتهي.. الكلام ده مش دلوقتي بس والسنين إلي فاتت بحجم ضخم من الأكاذيب والافتراء زي ما قالوا مثلا اختطاف الأطفال أو اختطاف النساء أو الهجوم على البيوت وكأن مفيش أمن، طب هفترض إن ده موجود هو الصح بتاعه إنك تقوم تهدها علشان تزود أكتر بدل ما يبقى الخطف مثلا نسبته صغيرة يبقى نسبته كبيرة بدل ما يبقى الخراب صغير والهجوم على البيوت صغير يبقى كبير، لكن الهدف كل هو عايز يعمل إيه”.

وتابع: “أوعى تفتكر إن ده جاجة داخلية، الشغل ده بيتعمل بين أجهزة مخابرات وأنا مش بتكلم على دول خالص، من حق الناس انها تفكر تخربنا، المهم انك تكون متدرب كويس ومستعد إنك تفشل خطته، الفكرة كلها إن احنا لينا خصوم، والخصوم دول مش من مصلحتهم إن مصر تبقى كويسه، بلد فيها 120 مليون نسمة معدلات الحركة بتاعتها ونموها لو استمر من 10 لـ 15 سنة هنبقى في حتة تانية بفضل الله مع غيري ومع إللي بعدي”.