> غريبة يا دُنيا العُملة والملاعب.. دِى العُملة عندنا دوارة.. شوية مكسب وشوية خسارة.. تسألوني: أيه مُناسبة الكلام ده يا كابتن كيكو؟! أجاوبكم :علشان لما ينزل فريقى «الجنيه الهرمى» و»الدولارالترمباوى» أرض المستطيل الأخضرلازم نفهم أن المباراة دِى مصيرية .. دِى مش مصيرية وبس.. دِى مباراة حاسمة على مستقبل فريق عُملة بلدنا !
> النهاردة شايف مُباراة حماسية وضربات قوية مُثيرة.. أوووه يا سلام سلم.. الكورة الدولارية خلت الحريفة تتعلم.. سامعين معايا صافرة النهاية؟! مُباراة القمة انتهت الآن لصالح فريق «الدولارالترمباوى» بنتيجة تصاعدية 1+50) ) !!
شواكيش ع التريند
> لو قُلت لك:3000 جنيه تكفى شهرياً؟- أكيد هتقولي: محتاجين كده بركة « الشيف الشربيني»!
> لو قُلت لك: قصة الغلاء وما فيها ؟!- أكيد هتقولي: اللى فيها 6000 جنيه ما يكفيها !
> لو قُلت لك: الأسعار رايحه على فين؟!-  أكيد هتقولي: رايحة للسما ومش لاقيه حد ينزلها!
> لو قُلت لك: هل أكل اللحمة من الكماليات؟!-  أكيد هتقولي: معلهش.. سألتك قبل ما تدبح!
> لو قُلت لك: الغلبان ديماً بيحلم  بإيه؟!- أكيد هتقولي:100 جرام لحمة من» بيت اللوح»!
> لو قُلت لك: نصيحتك لما أركب مترو الغلاء ؟!-  أكيد هتقولي: مش قادر تدفع «ما تركبش»!
> لو قُلت لك: الدولار بيجرى ورا إيه ؟!-  أكيد هتقولي: ورا صاروخ الأسعار!
> لو قُلت لك: مصير الجنيه فى أسواق الغلاء؟!- أكيد هتقولي: ما يساويش على مفيش!
> لو قُلت لك: لما تروح أسواق الغلاء- أكيد هتقولي: بمشى أعمل «لايكات» على لهيب الأسعار!
> لو قُلت لك: سعر «العدس» فى شتاء الغلاء-  أكيد هتقولي: اللى ميعرفش يقول « عطس»!
> لو قُلت لك: الحكومة تُطبق سعر «مرن « للدولار! أكيد هتقولي: يا سااااتر يا سااااتر !
> لو قُلت لك: مخضوض من رفع سعر الدولار!- أكيد هتقولي: هاتوله «طاسة الخضة»!
> لو قُلت لك: الدولار كسرحاجزالـ 50جنيه فى السوق السوداء؟!- أكيد هتقولي: يا نهارأخضر!
> لو قُلت لك: الدولار فوق صفيح ساخن!-  أكيد هتقولي: يا نهار «تعويمى» وسخونته زيادة !
> لو قُلت لك: أحكى لى عن دولار الغلاء!- أكيد هتقولي: ما تحكيش ده الجنيه  قُدامه ما يسويش!
> لو قُلت لك: نصيحة أيامنا الغابرة -  أكيد هتقولي: منّ شاف زنقة «الدولار»هانت عليه زنقته!
> لو قُلت لك: علاقة «الهندزة» بالصحافة والإعلام؟ أكيد هتقولي: تظبيط مكن وتحسين صورة!
> لو قُلت لك: صاحب الصورة طِلع «باشمهندس» كورة!- أكيد هتقولي: ده لعيب الشو يا هندزه!
> لو قُلت لك: البيض التركى غزا الأسواق-  أكيد هتقولي: يا بيض أبيض وصفاره مشمشى !
> لو قُلت لك: زيادة أسعار تطعيمات المسافرين! - أكيد هتقولي: يا مسافر وحدك.. وفايتنى!
> لو قُلت لك: تعليمك أهم من صحتك!! -  أكيد هتقولي: يا وزير اللطف يا رب !
> لو قُلت لك: صرفت مرتبك من الــ ATM ؟- أكيد هتقولي: بلاش تحسدونى لما أسدد ديوني!
> لو قُلت لك: آخر صيحة فى عالم التسول؟!- أكيد هتقولي: «الشحات الآلي» ع الناصية !
> لو قُلت لك: أكبر عٌملة فى  المتحف ؟- أكيد تقولى : مفيش غيره .. الجنيه الجبس !
> لو قُلت لك: شوفت الجنيه «المغسول»  فى سوق الغلاء؟ -  أكيد هتقولي: شوفته أكثر بياضا!
> لو قُلت لك: بلاش نتكلم عن دولار الماضي-  أكيد هتقولي: كلامك « تعويم « ع الفاضي!
> لو قُلت لك: حكمتك هذا الأسبوع عالتريند-  أكيد هتقولي: أتقى شر «الدولار» إذا غضب!