"اليوم راح اختار منكم راعي مقالة اليوم"، قالها الشايب ثم اضاف: "منهو فيكم جاهز بموضوع شيق وبنفس الوقت طريف عشان نكسب ابتسامة أعزائنا القراء"؟ فجأة صاح الجميع "سا سا سا سا على طريقة، ورعان ثالثه رابع ابتدائي، وهم رافعين أيديهم، وكان الاختيار على ابو الرجال اللي رافع إصبعه بأدب جم، وقلبي يقول لي عطه المايك ترى ما تندم"!الرجل: "يقولون اثناء جولة مدير أحد المصانع للإشراف على حبل العمل بمصنعه چاف (الله يمسيك بالخير يا محمد اچووفه) واحد من الشباب ملزق ظهره على الطوفة، لا شغل ولا مشغله. چان تثور أعصاب مديروه، وقم وجه له سؤال بالتسعين: انت يالحبيب هاو مشط معاشك؟ رد ابو الشباب بكل برود بقبض حوالي 150 دينارا، بس لا ليش السؤال يا عمي؟
على طول مديروه فتح الولت حقته (بوكه) وعطاه سبع عشرينات، وعشره ثم قال: المعازيب يدفعون للعمال فلوس عشان يشتغلون، مو يتراكون على الجدران، يالله عطنا مقفاك اطلع، بغا انت فينش!
ابو الشباب ما صدق خبر، حط الفليسات بجيبه الوراني، وقم عاضض طرف قميصه بحلچه، وفركلها ركض بدون اي چلمة، ولا جبر خاطر ولا سلام من بعيد!
عندها زأر المدير حال بحال السبع، وقال: الهدرة المرة الجاية موجه تربية بدنية لكل العاملين بالمصنع، اللي يتكاسل، هذا مصيره فنقر عسماوي للشارع، وأتمنى اللي صار عبرة لكم من لك وله! ومن ثم نادى على أحد السوبر فايزريه بالمصنع، من اللي شافوا الحادث، وسأله اكتب تعميم باسم العامل المطرود عشان الأمن ما يدخلونه للمصنع مرة اخرى!فرد المسؤول: يا طويل العمر اللي انت طردت عامل توصيل طلبات، ما هو من عمال المصنع، سلامة الشوف"! المعاق: "الله يسعدك على هالسالفة الحلوه يابو الرجال، بصراحة ارتسمت على محيانا ابتسامة نحسد عليها، بس ياليت تعلمنا وش المغزى من سالفتك، لان الفهم ناسيه عند اهلي"؟
الرجل: "العجله، وما أدراك ما العجله قزاز، لا بارك الله فيها، لانها تفقد الواحد تركيزه، وتخليه حول من أمه"!
المتمولس: "الوو يا عمي الشيخ عندي سين يبي له جيم متى عيد الحسافة؟ جيم ماكو بس ليش؟ يا اخي ابي احتفل بناس تعرفت عليهم بالغلط"! وفي هذه الاثناء رفع على مسامعنا الشيخ زغلول اذان الظهر.
كاتب كويتي
0 تعليق